Pesjoenadvies veur warkgeewers
Met ’n good inkommen kö’j better oetkommen
Nemm-ie veur ’t eerste moal niej perseneel an? Mu’j dan ok nen pesjoenreegeling anbeeden? Val-ie messchien oonder nen verplichstelling van ’n pesjoenfonds van de bedriefstak of van ’n CAO? In oonze wet steet narns dat zee oet könt verplichen um ’n pesjoen veur oew perseneel te reegeln. Toch is et meuglik dat d’r vanoet nen bepoalde bedriefstak of CAO nen ‘collectieve pensioenverplichting’ besteet. A’j voldoot an de warkingssfeer van zo’n bedriefstakpesjoenfonds of CAO, dan mu’j dit voolgen en dan mu’j alle warknemmers anmelden as deelnemmers. A’j dat dreks terechte maakt, dan kan oe niks oawerkommen.
Mer….. et is wat aans a’j dat völ laater oontdekt, of, nog arger, ’n pesjoenfonds kik d’r oe achterhen. Dan he’j de raapen gaar! Dan mut met terugwarkende krach ansloeting plaatsveenden. En dus ok veur de betaaling van de premie. En dat geet vaake oawer gloepens groote sommen geeld. Ok hier geeldt dat veurkommen better is dan geneazen!
Et Twents Pensioenbureau kan in oew opdrach ‘n ‘warkingssfeeroonderzeuk’ oetvoeren, um noa te goan of oew oondernemming oonder zonnen verplichstelling vaalt.
Koomp dit veur ’n droad dan bi’j d’r mooi op tied biej. De risikos bint zoo groot, dat eagenlik elken beginnenden oondernemmer zon oonderzeuk zol mötten loaten oetvoeren. En dat geet wieder dan eawn de SBI-code biej de Kamer van Koophaandel noakieken……
As d’r sproake is van nen verplichte ansloeting biej ’n bedriefstakpesjoenfonds, dan mut alns in gaank wödden e-zet. Et Twents Pensioenbureau kan oe doarbiej van deens ween.
Hoof-ie dan wieders niks meer te doôn? Bo wisse, nee! De inhoald van de reegeling steet wal vast en zal wödden oet-e-voerd deur ’t juuste pesjoenfonds. Mer iej as oondernemmer hoalt geduurig an ‘n ‘informatie zorgplicht’! Kiek hierveur ok eawn biej ’t oonderwarp ‘Pesjoenkommunikaasie’!
Woarveur kö’j as warkgeewer biej et Twents Pensioenbureau terech?
- Warkingssfeeroonderzeuk: is d’r nen bedriefstakpesjoenfonds of CAO?
- Advies biej et in gaank breengen van nen pesjoenreegling
- Advies biej et wiezigen of verlengen van nen pesjoenreegeling
- ‘Second opinion’ oawer de loopende pesjoenreegeling (‘pesjoenscan’)
- Advies biej ’t opskriewen van pesjoenoonderwarpen in perseneelsdokumenten (haandbook, arbeajdsoawereenkoms, pesjoenoawereenkoms, enzoomeer).
As d’r nen pesjoenverplichting vanoet de CAO besteet, dan bint d’r vaake ‘minimumeisen’ van krach oawer nivo, inhoald en oetvoering van de reegeling. Et Twents Pensioenbureau kan oe hierbiej adveseren en biejstoan.
Is d’r kats gin verplichting vanoet ’n bedriefstakpesjoenfonds of CAO, dan bi’j heelmoal vriej um wal of nit ’n pesjoen veur oew warknemmers te reegeln.
Et Twents Pensioenbureau kan oe heelpen met ’t oontwarp van nen passenden reegeling en oe doarbiej adveseeren. Doarbiej hört netuurlik ok et infemeeren van de warknemmers, en, zoo meuglik, ok de oondernemmingsroad of aandre organen, dee at opkoomt veur ’t perseneel.
Et Twents Pensioenbureau hef ingaank tot ’n stark netwark van spesjalisten: rechsgeleerden, rekkenmeisters, actuariële roadgeewers en aandre prefessionals, dee at onmeunig völ wett van pesjoen en alns wat doar varders met te maaken hef. Oonder ’t motto ‘elk meensch hef zien eagen talenten en beparkingen’ bi’w aajt op zeuk noar saam’warking, met an ’t ean mer één dool: oe as klaant heelpen biej ’t oplössen van oew vroagstuk.