Pesjoenkommunikaasie veur warkgeewers

Wet Pesjoenkommunikaasie en zorgplich warkgeewer

Vanof 1 juli 2015 he’w nen nieje ‘Wet Pesjoenkommunikaasie’. Disse wet is d’r veur e-maakt dat pesjoenoetvoerders én warkgeewers meer mut doôn um inzich te gewen oawer de pesjoenreegeling den wödt gebroekt. En dee wet geeldt veur nieje warknemmers, bestoande warknemmers, oald-warknemmers, de partner, en de warknemmer den a pesjoen krig.

De meeste warkgeewers goat d’r veur ’t gemak van oet dat de pesjoenoetvoerder wal zorgt dat de warkgeewer voldöt an alle wetgewing.
Mer de pesjoenoetvoerder voldöt hier NIT heelmoal an, umdar zee nit doadwarkelik ketak hef met de warknemmers. Zee verwarkt allenig de infermaasie dee zee krig. Warkgeewers stoat ja völ dichter biej ere warknemmers dan pesjoenoetvoerders. Warkgeewers zeet en weet völ meer en könt doar op stuuren.

Hoe warkt dit noe in de prakteik?

Veur de indeenstreeding van ’n nieje warknemmer

Veurdar nen niejen warknemmer in deens koomp, is et belangriek dat hee/zee wett hoe de pesjoenreegeling warkt. Doarnöast mut wödden an-e-gewen wat de meuglike risikos bint, wat et pesjoengeewend salaris is, hoe hooge de inhoalding vanweggens de AOW is en wat de eagen biejdraage is, um mer es wat te neumen. Belangriek: dit mut almoal veur mekaâ ween veurdar de nieje warknemmer de arbeajdsoawereenkoms oonderteekent.

Is dit good e-reegeld in oons bedrief? Bi’w as warkgeewer good op de heugte van de pesjoenreegeling en wödt dat op begriepelike wieze oet-e-eleg an de (nieje) warknemmer?
Vroagen, woar at wiej as warkgeewers ’n good aantwoord op mut hemm’.

Mer: Et Twents Pensioenbureau kan de warkgeewer van boawen tot oonder ‘ontzoorgen’, as et um pesjoenkommuikaasie geet. En dat mut oe wat weerd ween.
Dit bint de veurdeelen veur de warkgeewer:

– Iej hooft de pesjoenkommunikaasie nit zölm te doôn en biej te hoalen.
– Iej kriengt meer betrökken en tevrean meedewarkers.
– Oew warknemmers wett op finansjeel gebied méér van ’n hood en ’n raand.
– Oew warknemmers hoowt zik narns drok oawer te maaken.
– Oew warknemmers bint doardeur völ meer betrökken biej oew bedrief.
– En: iej hebt meender pepierkroam deur beveurbeeld loonbeslagen.

Tiedens et deensverbaand

De wet geet nit allenig oawer nieje warknemmers, merg eet ok oawer de warknemmers dee a in deens bint. Bint dee leu ok ‘pesjoenbewus’? Wett zee ok nen heelen kroam van de pesjoenreegeling van eer warkgeewer? Infermeert mer es biej oew warknemmers, of zee wett hoe de pesjoenreegeling in mekaâ stekt.

Nöast de inhoald van de pesjoenreegeling is et ok belangriek dat de warknemmers infermaasie könt veenden oawer de verskilnde ‘leawensgebuurtenisse’. Vuurvallen dee stuk veur stuk van invlood bint op et pesjoen.
Doarbiej mu’j deenken an:

– Weerde-oawerdrach van pesjoenen.
– Meer of meender warken/verdeenen.
– Saam’wonnen en/of trouwen.
– Echskeajding.
– Arbeajdsoongeschiktheajd.
– Oontslag.
– Oet de tied kommen.

Warknemmers mut toogaank hemm’ tot infermaasie, at zik één of meer van disse leawensgebuurtenisse veurdoot.

Oet jurisprudentie en prakteikveurbeelden is noar vören e-kömmen dat wonneer ’n warknemmer hieroawer nit good is infermeerd, dat dat onmeunig groote gevolgen kan hemm’ veur ’t pesjoen. ‘Pesjoen 1-2-3’, de verplichte infermaasie vanoet de pesjoenoetvoerder, is nog a beparkt wat umvang angeet. En ’n warknemmer krig disse infermaasie eerst noa dat e in deens is e-treeden.

Wonneer de warknemmer dus nit good, nit volledig of nit op tied is infermeerd deur oe as warkgeewer, dan kan dit ok gloepens slech oetwarken veur oe en oew bedrief. Vanweggens ‘risikomanagement’ kö’j better veurkommen dan geneazen.

Et Twents Pensioenbureau heelpt de warkgeewer met et voldoôn an de zorgplich, oonder meer deur et anbeen’ van ‘online-pesjoen-infermaasie’, in de hoes-stiel van et bedrief van de warkgeewer. En in ’n sproak den veur alman begriepelik is. Zoo kan de warkgeewer nieje en bestoande warknemmers genog infermaasie geewen oawer de geeldende pesjoenreegeling.

Wiej kiekt geern veur oe noa o’j as warkgeewer voldoot an oen infermaasie zorgplich, met behulp van nen ‘compliancy check’, den wiej veur niks veur oe oetvoert.