Welkom biej Het Twents Pensioenbureau
Et “Twents Pensioenbureau’ breengt kennes, keunde en passie veur et vak van pesjoen biej mekaâ.
Op-e-rich in 2019, is et pesjoenroadgewer Dennis Slaa d’r um te doôn leu te heelpen biej ’t maaken van eere juuste pesjoenkeuzes. En dat döt-e op ziene eagen Twentse wiezez:
- met de beajde beene op de groond,
- veur alman te begriepen,
- met de haânen oet de möuwe
- en astebleef geern in oonze moôdersproak.
Biej et ‘Twents Pensioenbureau’ wödt alle oontwikkelings roondum ’t pesjoen sekuur e-volgd. Doarbiej könt zee terugge vallen op ’n groot koppel aandre leu, dee ok gloepens good weet hoe at de haazen loopt, as et um pesjoenen geet.
Alle klaanten van et ‘Twents Pensioenbureau’ kriejt op disse maneer nen ingaank tot de allerbeste infermaasie.
Alle gegewens, dee at d’r too doot, wödt um-e-zat in begriepelike taal. Doarbiej wödt gebroek e-maakt van spesjaale rekkenmedellen, dee oe op kloare wieze oawerzich, inzich en vastigheajd geewt.
Alman hef ja rech op vastigheajd in ziene of eere eagen pesjoensituaasie.
En dat begeent met inzich:
“Iej möt nit hooger vleengen, dan a’j veeren hebt.”
Eagenlik veur alman met nen pesjoenvroag: oondernemmers, warkgeewers, warknemmers, akountants- en administraasieketooren, avekoaten en oondernemmingsroaden.
Alns oawerpesjoenadvies
Um meer vastigheajd te kriengen roondum oew pesjoenvroag is aldereers belangriek um oawerzich en inzich te hemm’. Dat breeng ik heelder en trad veur trad in kaart. Zoonder ingewikkeld taalgebroek en zoovöl as meuglik saâm e-vat tot woar et warkelik op an koomp. Dus nen duudlike oetwarking van oew vroag, met nen kloare konkluuzie, woar a’j met wieder könt.
En veural nit ingewikkeld. Tiedens oonze eerste gemeudelike kuieriej koomp oew vroagstuk op toafel. Saâm formeleert wiej de belangriekste vroag. En wiej sprekt of hoe a’k dat veur oe goa oetwarken.
En dat doô’k op miene Twentse wieze: gewoon de haanden oet de möuwe, nuchter en prakties, met nen bulte loogies boerenverstaand. Biej de oetwarking za’k ok duudlik ween oawer de meuglike volgende stappen en de aktiepeunten.
Vaak gesteelde vroagen
In miene prakteik wödt vaake vroagen e-steeld oawer pesjoenoonderwarpen, beveurbeeld wat ’n bepoald begrip beteekent. Dat leg ik oe dan hoarfien oet. Wi’j wetten um wukke vroagen as et geet en wat de oetleg doarbiej is? Kiek dan op de Hollaandse bladzieden. Disse oetleg loa’w in et ABN stoan, zoo dat dit veur alman good te leazen en te begriepen is. Iej mut wetten dat et hier um oarege pesjoenbegrippen geet, dee at zik nit makkelik loat vetaaln noar ’t plat. Zoo gedöanig.